I giardini
di u Gran'Palazzu di a Cullettività di Corsica
Appena di storia ...
In la siconda mità di u XIXmu seculu, quand’ella era Aiacciu a Stazioni invirnali pridiletta di i pratichi inglesi è tedeschi, ci era da dì nant’à i capacità di l’alberghi di a cità. Tandu dicisi l’anzianu merri, u conti Forcioli – Conti, di fà custruì u Grand Hôtel nantu à u soiu. Dumanda à u so amicu architettu Barthélémy Maglioli di cuncipillu è à un paisaghjistu liunesi, Charles Peyrouse, di disignà u ghjardinu è u parcu.
Pinsatu par essa scupartu in calescia, u ghjardinu t’hà sempri i vistighi di i so andaghji adumbrati è fiuriti, à mezu à a ruccaglia. Una viottula larga, aparta nantu à u corsu Grandval, da ogni latu di u Parcu, parmittia i passa è veni di i vitturi chì andaiani à i sirati à u paviglionu balniaru di l’Ariadne-plage.
Suvitendu a moda di i ghjardini esotichi di a Costa azura, funu posti essenzi di paesi landani, chì ci tiniani i Britanichi.
Cù u tempu, u ghjardinu si cunfeci à i brami di i sfarenti prupiitarii è hà vistu suvitassi unipochi di paisaghjisti.
Oghji hè ciò chì ferma di u Parcu di l’ultimi prupiitarii di l’Albergu, M. è Mma Raccat, chì vulianu rifà u giardinu favulosu di u so scontru. Iscritti à l’invintariu supplimintariu di i Munimenti storichi da u 1992, i ghjardini d’oghji, prupiità di a Cullittività di Corsica, cunservani sempri spezii assignalati.
...è di Butanica
Da arboni à essenzi fiuriti, passendu pà i cuniferi, u clima aiaccinu parmetti a cuesistenza di una gran diversità di spezii, è u sbuccà di ambienti specifichi.
L’acqua hè in cori à u ghjardinu, puri ch’ella ùn sighi missa in scena diretta. Par indittu, i pianti sò accolti cù esattezza sicondu i so bisogni in acqua. Omu pò capità nantu à una scena di « ghjardinu seccu » – pianti di diserti australiani o sudamericani – è in altrò nantu à un ghjardinu subtrupicali umidu, culunizatu da Ghjacarandi brasiliani è una filetta arburiscenti.
Storia di u Gran'Palazzu
Scupriti a storia di u « Gran Palazzu di a Cullettività di Corsica » d’Aiacciu…