Da u « Grand Hôtel Continental »

à u palazzu di a Cullettività di Corsica

À l’iniziu

Aiacciu, stazioni d’invernu

À leghja i crunisti, sò i medichi à l’urighjini di l’avvinimentu d’Aiacciu da stazioni turistica.

Da u 1852, duttori rinumati principiani à ludà i ricchezzi naturali di a cità, ma soprattuttu a qualità è i benfatti di u so clima pà a saluta. Dopu, vinarani i « fundatori » di a stazioni. Pigliarani a seguita prumuvendu l’accuglienza è a stallazioni di i primi turisti d’invernu, in particulari Inglesi è Alimani. Cù a custruzzioni di alberghi famosi, u sughjornu di parsunalità di prima trinca di l’aristucrazia aurupea a rinoma è u prestigiu di a cità imperiali sarani cumpiiti. Tandu u sonniu turnarà rialità. A ricunniscenza di Aiacciu da stazioni invirnali di primu ordini firmarà sin’à u 1912… dui anni nanzu à a guerra di u 14.

AFFICHE : David Dellepiane (1866‐1932) Ajaccio – Corse
© CdC, musée de la Corse/Christian Andreani

Dimustrendu quant’ellu era bonu u so clima i medichi sò stati à l’urighjini di u prughjettu « Aiacciu, stazioni climatica d’invernu ». Hè statu u duttori Donné, rittori di l’Accademia di Montpellier u primu di quilli. U clima aiaccinu sendu beneficu pà curà a malatia di a so moglia, hè incantatu è ni faci un articulu in u « Journal des Débats » di u 15 di farraghju di u 1852. « Ùn cunnoscu nisuna cità situata di megliu, più bella è più giuiosa cà Aiacciu.» Deci anni dopu, suvita u so asempiu un duttori inglesu, u duttori Bennet, dicendu chì Aiacciu hè « unu di i più belli lochi d’Auropa, cù un clima bellu più beneficu cà quillu di a Riviera », è dopu à ellu dui altri cunfratelli facini listessa, l’inglesu Ribton è l’alimanu Biermann.
In u frattempu u duttori de Pietra Santa, unu di i medichi di l’Imperatori, hè statu incaricatu da Napulioni III di fà un studiu di climatulugia in Aiacciu. U so studiu di quattru mesi sbuccarà, in u 1868, nantu à a publicazioni, sottu à a so signatura, di un libru intitulatu « A Corsica è a stazioni d’Aiacciu » induva scrivi chì « a cità pruponi risorsi prizzevuli pà i malati cù i so acqui minirali, in più di i cundizioni climatichi è chì prumettini u più bellu avvena à a stazioni nuvella ». Attratti da tanti qualità di issu locu, i cumpatriotti inglesi è alimani ùn stani tantu à vena à scopra quillu clima aiaccinu ludatu tantu.
U 1868 : annata dicisiva pà a prumuzioni d’Aiacciu, stazioni d’invernu. Ma ghjunghjendu i primi villeghjanti d’invernu, si farà evidenti a mancanza di strutturi d’accuglienza. Tandu ani da andacci francu trè parsunalità da circà à scioglia u prublemu è essa ricunnisciuti in tantu cà i veri iniziatori di u turisimu climaticu in l’isula.

In prima locu, u conti Bacciochi, gran ciambillanu è soprantindenti ginirali di i Teatri imperiali. Fù ellu à stabiliscia i principii di a stazioni d’invernu quand’ellu dicisi in u 1862 a custruzzioni di quattru cottages in la so cità nativa è ch’ellu uttensi da u Guvernu una linia marittima trà Nizza è Aiacciu.
A siconda parsunalità hè Miss Thomasina Campbell, Britanica famosa è pussidenti scuzzesi, chì à ciò chì si dicia era cusì « bramosa di veda Aiacciu divintà stazioni invirnali » ch’ella lanciò pareghji prughjetti è azzioni senza mai ceda di pettu à l’inerzia di l’Amministrazioni.
A prova si n’hè a custruzzioni di a ghjesgia anglicana di a Trinità, fatta à i so spesi è curata da ella stessa in u 1878, nantu à u corsu Grandval.
In li so « Noti nantu à l’isula di Corsica », publicati in u 1868, ci sarani tanti inviti à i so littori : scrivia « Suvitetimi !» (…) « U paisaghju hè assai troppu bellu è troppu maistosu da ch’e possi spirà rendeli ghjustizia . Ùn possu dì megliu cà di cunsiglià di vena è di veda da par sè ».
Infini veni u conti Multedo : Aiacciu li devi l’apartura è a prupiità di u viali Sylvestre Marcaggi attuali, chì porta sempri oghji u nomu di « Quartieru di i Stranieri ».
Ci vularà à aspittà sin’à u 1887, par veda u prifettu Grandval accunsenta, à l’istigazioni di deci parsunalità frà i quali u duttori Frasseto, u banchieru Lanzi, l’architettu Maglioli, u major inglesu Murray è u librariu Rocca Tartarini à a criazioni di l’associu « Aiacciu stazioni d’invernu … » U so scopu sendu di aiutà à a stallazioni è u sughjornu di i stranieri in la cità. L’associu turnarà sindicatu d’iniziativa in u 1904.

 

Tea time

in Aiacciu

I primi invirnanti sarani pà a maiò parti stranieri suvitendu a strada di parsunalità famosi, tali u major Murray, Miss Thomasina Campbell è u pittori Edward Lear, chì lasciarani da u so sughjornu in l’isula una tistimunianza chì palesa a so passioni pà Aiacciu. Sarani pussidenti, à spessu vinuti cù i so sarvi, in cerca di esutisimu è di pitturescu. I so raconti di viaghji sò ricchi d’infurmazioni è d’ussirvazioni nantu à temi ch’elli ani in cumunu. Stunendusi di a poca fama di a Corsica, Miss Campbell sarà a gran prumutrici di l’isula : « Ùn pari mancu vera chì i muntagni, i mineri, i marmari è l’acqui minirali chì ci sò à ribocca siani cunnisciuti cusì pocu, chì un clima cusì dolci chì è un diliziu è attempu cusì beneficu, sia ricircatu cusì pocu ». D’altrondi, non solu si stona, ma andarà sin’à dinuncià i causi di issa poca rinomina di a Corsica. Scrivi : « Hè a moda nantu à a Riviera di parlà mali di a Corsica è di pridì tanti frebbi è tanti guai à quilli chì ci vani. A socu da a spirienza è par contu meiu tutti quilli chì avarani l’animu di sfidà issi foli di vechji donni m’ani da ringrazià d’avè mustratu l’esempiu (…) (…) » Stallata in Aiacciu, Miss Campbell ci scuntrarà un pittori britanicu Edward Lear, avvezzu à viaghjà, è chì i so publicazioni rilativi à l’Italia è l’Albania ani tantu successu chì u so publicu aspittarà impacenti u racontu di u so viaghju in Corsica. I so primi imprissioni sarani quilli di un artistu chì rimarcarà l’assenza di vistighi architetturali in un dicoru di un splindori chì hè soprattuttu quillu di a natura.
Ma dopu avvinta l’isula sana, u so primu sintimu cambiarà assai è palisarà chì tanti billezzi sò fatti pà u pittori. « L’isula porghji à u pittori chì ci stà un campu infinitu di ricerchi ». Miss Campbell s’infiara pà « un orlu di mari incantevuli fattu di tanti cunchigli, di rena fina fina è di bellissimi scogli (…) à u cuntrariu di Nizza induva ùn aveti altru cà cuttuloni », inveci Edward Lear, prizzarà di più u futuru corsu Grandval – chì divintarà dopu u Quartieru di i Stranieri – induva, sicondu Miss Campbell, si facini corsi di cavalli i 12, 13 è 14 di maghju, à l’uccasioni di a fiera di San Pancraziu, è a strada di i Sanguinari, induva si compiini i travagli chì riligarani Vignola à a Torra di a Parata.

Stranieri è cuntinentali in villighjatura in Aiacciu ùn mancarani di visità cù emuzioni a casa nativa di Napulioni. Sicondu Miss Campbell, « Ùn ci hè nimu chì, vinendu in Aiacciu, ùn sighi bramosu di veda a casa induv’ellu hè natu Napulioni (…)
Ci voli à spirà chì a cità tinarà à cunsirvà i vistighi chì rammentani i tempi di a zitillina d’issu Gran Parsunaghju, chì, cù u so nomu solu, faci unori à Aiacciu è à a Corsica »
Si capisci issu pinseru parchì, quandu u principu Roland Bonaparte faci un viaghju in Corsica in u 1887, a casa nativa di l’imperatori hè data à pighjò à una famiglia inglesa ! Émile Bergerat, chì l’accumpagna, s’affendi di a mancanza di rispettu da a parti di l’Aiaccini. « Uffa ! Sta casa guasgi sacra, hè sfruttata tali una casa di raportu ! Omu si senti culpitu quantunqua (…) » Cunsultendu in u 1913, u righjistru di i visitori, René Bazin nota a vinuta di Edouard VII, di a righjina d’Ingliterra è di a principessa Maud. « Notu dinò assai nomi alimani nantu à issu quaternu di carta » A parsona chì l’accumpagna li diciarà tandu : « Ùn vi stuneti micca. Vidimu di più Inglesi è Alimani quì cà Francesi di u cuntinenti »
U clima aiaccinu sarà u fattori principali di issu turisimu d’invernu è i stranieri ùn mancarani di parlanni. Miss Campbell diciarà chì nisunu clima hè più piacevuli cà quillu d’Aiacciu, induva i mesi più prizzevuli sò ghjinnaghju è farraghju. Aghjustarà : « A Corsica hè una di i pochi stazioni midicali induva i malati poni stà d’istati, parchì à pochi ori da Aiacciu, ci sò unipochi di paesi muntagnoli induva si pò rispirà un’aria bona quant’è quilla di i muntagni sguizzeri, senza i fatichi di u viaghju. I stranieri aspittavani assai di issu clima salutariu. Pà i spiazzamenti, Miss Campbell ricumandarà à i so amichi di piglià vitturi tirati da i cavalluchji.
Ùn mancarà di rammintalli, à stu prupositu, chì « sì in u 1840 ci era una strada reali unica, l’isula avia oramai stradi imperiali novi, dodici stradi furistieri è cinqui stradi dipartimintali ». Alberghi è alloghji ni sò tandu à i so primi passi. Miss Campbell mintuva l’Hôtel du Nord, l’Hôtel de Londres, l’Hôtel de France, induva scalarà rigulari à partasi da u 1869. Issi alberghi pinsioni, ruzulani è rimurosi, ùn pudiani spirà di piacia à una classa asgiata avvezza à u lussu è à i cumudità. Hè tandu chì Miss Campbell principiarà a ridazzioni di u so libru, ch’ellu si parlarà di a custruzzioni di un novu albergu nantu à u corsu Grandval da induva omu pudarà goda di una bellissima vista nantu à u golfu è a cità.

Capu di prua

di u quartieru di i Stranieri

U « Grand Hôtel et Continental » d’Aiacciu sarà pisatu trà u 1894 è u 1896 da l’architettu Barthélémy Maglioli nantu à a strada aparta sottu à u Sicondu Imperu da riligà u Diamanti à u Casonu. Si devi a so custruzzioni à u conti François-Xavier Forcioli-Conti, chì ni pigliarà i spesi in carica. A girenza ni sarà assicurata da un ustariaghju sguizzeru, Théophile Hofer.
À u centru di un parcu di 12 000 m2, U Grand Hôtel hà tandu centu camari è salotti lussuosi, una sala da manghjà pumposa è un’intrata urnata da una culunnata in trompe-l’oeil. Avarà da currispundenti, à l’epica, u Winter Palace di Menton, u Carlton è l’Hyde Park Hotel di Londra, L’Hôtel Ritz di Parighji , U Grand Hotel di Roma è u Frankfurterhof di Frankfurt.

Tali un gran rittangulu stinzatu

L’edifiziu si prisenta tali un gran rittangulu stinzatu. I matiriali di custruzzioni sò a petra scialbata pà i facciati, una muratura falsa nantu à l’anguli è u granitu pà i culonni di u purtonu di l’intrata. L’elevazioni antiriori à Sudu, à quattru piani, hè furmata da un corpu cintrali dilimitatu da dui avancorpi chì supraneghjani i tetti.
I dui ali sò in a prulungazioni di u corpu cintrali, inquatrati da muratura falsa à rilievi À a facciata u ritimu hè datu da doppii frisgi urnamintali.
I dui avancorpi sò compii da loghji cuparti da un arcu in mezaluna sustinutu da dui culonni ingaghjati à capitelli dorichi. Da sopra è da sottu à i loghji ci sò ghirlandi à mutivi di fiori à rilievi. In a parti suprana, si vedi un pannellu pintu cù effettu di materia. I cunsoli à voluti sustenini i curnicioni è in cima à i tetti di l’avancorpi dui pignotti signalani u capimonti.

L’intrata principali accupa u centru di a facciata cuparta da un timpanu in mezaluna è urnata da dui culonni in granitu à capitelli ionichi. U balconu à culunnetti di u primu pianu hè postu nantu à issu curnicionu.
À manu dritta di l’edifiziu, l’appicciu era riligatu à l’albergu da u gran salottu cù una facciata urnata da una rumbatura cuntinua. L’intrata di l’appicciu si rimarca par via di un scalonu cù culunnetti in fonti supranati da una tittoghja è da una ringhera anch’ella in fonti. L’aparturi di u primu pianu sò supranati, in u corpu cintrali, da fruntoni à curvi sustinuti da cunsoli à voluti.

***
Vicinu, da u so stilu, da l’alberghi chì sò pisati nantu à a Costa Azura à listessa epica, u novu stabilimentu assicura à i so ospiti à volti famosi cumudità lussuosi. Semi bellu luntanu da l’epica di i primi passi di l’anni 1860.
Eccu a discrizzioni fatta da Victorien du Saussay : « U Grand hôtel d’Ajaccio et Continental hè u palazzu mudernu di a cità. Si alza da sopra ghjardini in fiorisi, nantu à u fiancu di una cullina virdicenti induva crescini è fiuriscini i fiori è l’arburi i più diversi ».

I balconi s’aprini tutti à u Sudu. Maistosu è allegru, supraneghja u mari. Da l’altu mari, s’offri tali un caravanserragliu di sonniu in u so adornu di palmi giganti »

A distribuzioni interna ùn hè menu intarissanti. À u piantarrenu, ci sò l’intrata, u salottu da manghjà à manu manca è po l’alloghji di u dirittori à manu dritta. I dipindenzi sò uriintati tutti à u Nordu – Cucina, attellu, cantini, cabinetti – A parti à lati tagliati chì rilega l’appicciu à l’albergu ghjova da salottu pà u sdighjunu è cunduci à a sala di ballu. Ma hè da veru a sala da manghjà chì dimostra propiu a qualità di u stabilimentu. « A sala da manghjà hè da rimarcà par via di i so Spechji, u so caminu è i so quatri. Tuttu hè munimintali. In fondu, una statula di donna chì teni un remu riprisenta a cità d’Aiacciu, sottu issa iscrizzioni : « Napoleonia Civitas », supranata da l’armi di a cità è di un’acula alisparta. (…) Infini, da sopra à a porta di a gallaria, ci hè a tribuna fatta à volta di l’orchestru ».

In u 1903, a girenza di u « Grand Hôtel d’Ajaccio et Continental » passa in manu à Paul Lafond-Prével, prupiitariu di «l’Hôtel de la Trémouille » in Parighji. Ni mudificarà a sala maiò di l’intrata, chjudendu u spaziu cù porti vitrati tamanti, criendu cusì un veru ghjardinu d’invernu. L’albergu sarà dopu a prupiità di Maurice Prével, prupiitariu di u « Grand Hôtel de la Paix » è di « l’Hôtel Méditerranée » in Nizza.

Una clientella pristigiosa

I listi di l’invirnanti publicati da a stampa di l’epica sò pieni à principi, conti, baroni, austriachi, alimani, inglesi, ma ancu parighjini… a listessa clientella cà a Costa Azura. Una clientella chì farà a fama di u « Grand Hôtel d’Ajaccio et Continental ».
Di fatti, i parsunalità aurupei i più cunnisciuti tandu sò pratichi di u stabilimentu. Ci si capitarà à l’imperatori di l’Austria è u rè d’Ungaria, Francescu Ghjiseppu 1mu di a dinastia di i Habsburg è a so moglia Amelia Eugenia Lisabetta di Baviera detta « Sissi » o ancu u scrivanu Jozef Konrad Korzeniowski, dettu « Ghjiseppu Conrad », autori frà altru di « Lord Jim » è di « In cori à i tenebri ». In u 1902 è pà quattru sittimani, a so Altezza Reali u Duca Ghjorghju II di Sassonia Meiningen ci starà è partarà cuntenti di a so saluta, senza mancà di distribuì dicurazioni à i funziunarii di a cità in ringraziamentu par essa statu accoltu bè. Sì l’edifiziu hà pussutu cusì participà à u sviluppu di a cità sottu à u sicondu Imperu è a IIIza Ripublica , hè grazia di sicuru à i so prupiitarii chì sò di i più arditi frà l’ustariaghji aiaccini . Scrivi Francis Pomponi in u so libru « Storia d’Aiacciu » : « Mettini à u puntu un prudottu turisticu più garbatu, aghjustendu à l’incantu i so strutturi d’accuglienza – salotti ampii, camari spaziosi cun bagni, ghjardini esotichi, tarrazzi adumbrati, dicori barocchi framanti… quì dinò sicondu u mudellu di a Costa Azura – u sughjornu in muntagna, à a Foci di Vizzavona (…) »

Un certu Téophile Hofer

Ùn saria micca ghjusta di sminticà u rollu maiò in la rinoma intirnaziunali di u Grand
Hôtel d’Ajaccio et Continental di u so girenti, u sguizzeru Théophile Hofer. Avia cumpratu ellu in u 1880 u « Germania », un albergu apartu in u 1868 à u numaru 10 di u Corsu Grandval da un certu Gerhard Dietz, nativu di Hannover.
Un albergu induva, sicondu un tistimoniu di tandu, si pudia scuntrà « una prucissioni longa di belli donni in tinuta fresca, di cavalieri chì, vinuti in Aiacciu malati è stanchi, aviani ritruvatu una saluta soda quant’è u so appitittu. Francesi, Alimani, Russii, Pulunesi, Taliani, Austriachi, Spagnoli si fianchizzani è posani l’unu dopu à l’altru senza primurassi di l’odii è di i rincori di a pulitica (…). Dietz hà scioltu u prublemu chì si circava in darru à scioglia in l’alberghi i più ricchi di Nizza è di i stazioni miditarranii : a vita eleganti à bon pattu.»

U primu attu di u prupiitariu sarà di cambià u nomu di u stabilimenti chì divintarà
« l’Hôtel Continental » senza perda nulla di a so nomina. À u cuntrariu, postu chì à leghja a Guida Joanna, « u stabilimentu uffria tutti i cumudità di l’alberghi di primu ordini : cucina francesi è vini di prima scelta, salottu di riunioni, bibbiuteca, fumatoghju, ghjardinu è furesti maiò d’alivi à fiancu à l’alrbergu. I prezzi erani mudirati. Un medicu era à dispusizioni di a clientella in l’albergu stessu è erani praticati curi speciali pà i malati.»
Quandu, in u 1896, Théophile Hofer accetta di piglià a girenza di u Grand Hôtel d’Ajaccio et Continental, l’anzianu albergu « Germania » diventa un appicciu di u Grand Hôtel è a so sala maiò sarà assistata da sala di i festi. « Ci sarani i balli urganizati da a culunia straniera da rompa a munutunia di a vita invirnali »

Mentri chì i yachts lussuosi sò di più in più numarosi in u portu, balli è ricizzioni, animati da l’orchestru talianu di u Grand Hôtel, aduniscini in i salotti di u stabilimentu l’aristucrazia straniera è i parsunalità di u « gotha » aiaccinu.
Di listessa manera, u paviglionu di l’Ariadne chì ni dipendi accogli stu publicu à u bordu di mari in Barbicaghja.
L’Aiaccini accoglini benissimu l’invirnanti è l’invitani à tutti i festi : balli di u Grand Hôtel, ind’è u viconti Sebastiani o Jean Lanzi, un cumircianti riccu. Assistini dinò à i cuncerti urganizati à u Grand Café Napoléon.
Sò fatti chì piacini assai à u Duttori Bennet « In Aiacciu, ci hè una bella sucità ghjentili assai, tantu corsa cà francesa. Ci hè u prifettu, centru di tuttu ciò chì si faci in u mondu di i ghjenti bè, i ghjudici, i maghjistrati, l’ufficiali di u presidiu, l’inginiori, l’impiigati di altu livellu è tanti famigli corsi anziani. Tutti quilli chì sò stati in raportu cun elli mi sò parsi animati di una ghjintillezza trimenda pà i visitori, tantu naziunali cà stranieri, è bramosi di rendali sirviziu »
Hè in st’ambienti giuiosu chì u Grand Hôtel d’Ajaccio et Continental, comu a « Tour d’Albion », risidenza di Miss Campbell lasciata à lord Bradshaw, sarà u capu di prua di a sucità di l’high life d’Aiacciu pà i dui dicennii nanzu à a guerra di u 14.

U Palazzu

Di a Cullettività di Corsica

Istituita da a leghji di u 2 di marzu di u 1982 purtendu statutu particulari di a Corsica, a sedi di a Righjoni di Corsica hè posta pà un tempu à a Villa Pietri à u Casonu, è l’Assemblea di Corsica, prisidata tandu da Prosper Alfonsi teni i so sissioni à u Palazzu Lantivy.

Hè dicisu in u 1983 di fà di Aiacciu a capitali righjunali è di crià in a cità un novu casali da allughjà l’istituzioni, ma vistu l’urgenza di assicurà l’amministrazioni righjunali à l’altezza di i so bisogni  hè pigliatu à pighjò u « Grand Hôtel et Continental », chì tandu era a prupiità di a famiglia Raccat. D’agostu di u 1984, Jean-Paul de Rocca Serra, u Prisidenti di l’Assemblea di Corsica, voli chì a Righjoni si stalli in un casali di soiu. In u 1987, dicidi di trascioglia a quistioni è adunisci l’Assemblea di Corsica pà aduttà una dilibarazioni rilativa à « a cullucazioni di a sedi di a Righjoni ». In u listessu tempu, ci sò i niguziati cù i prupiitarii di u « Grand Hôtel » chì dani u so accunsentu di principiu pà vendalu, a vighjilia di a siduta di l’Assemblea di Corsica di u 25 di ghjinnaghju di u 1988. Cunfirmarà a so dilibarazioni l’Assemblea dopu à un cuntrastu storicu, in un ambiu criticu è  « disignendu Aiacciu cum’è locu di a cullucazioni di a sedi di a Righjoni ».

Si farà in dui tempi a compra di l’edifizii è di u parcu. Un prughjettu architetturali pà accoglia l’insemi di i sirvizii  hè cuncipitu da l’architettu righjunali François Van Cappel de Prémont è sarà sviluppatu da u cabinettu Giudicelli. In u 1990, a facciata è i ghjardini sò scritti à l’Invintariu Supplimintariu di i Munimenti Storichi da incalcà a vulintà di mantena a qualità architetturali urighjinali di i facciati. Da u 1992 à u 1996, si faci a prima allarghera par via di a criazioni di un edifiziu daretu à l’anzianu « Grand Hôtel » da allughjà i sirvizii amministrativi è hè cuncipita a sala futura di dilibarazioni.  
In quantu à l’anziani lucali, sarani riassistati in tuttu da u 1996 à u 1998 è ci si stallani i scagni di i Prisidenti di u Cunsigliu Isicutivu è di l’Assemblea di Corsica  è i scagni di i gruppi pulitichi.  

A sala di dilibarazioni  

Hè da nutà u spiritu chì hà animatu issi travagli di riabilitazioni (4 200 m2)  è di allarghera – 8 300 m2 – di l’anzianu edifiziu, tuttu hè assistatu in u rispettu di u situ è cù a vulintà di crià un’armunia trà l’edifizii di prima è i spazii di travagliu. Hè a sala di dilibarazioni l’elementu architetturali u più nutevuli in l’allarghera.  Tondula, crea l’equilibriu trà i tribuni di i dui prisidenzi, i fili di banchi di i cunsiglieri, i piazzi da a stampa è u publicu. Di fatti, « in un chjerchju ognunu hè à u centru » è i dibattiti  venini megliu. U trattamentu di u sulaghju cù u granitu è l’intavulatu furmendu una rusona ni rinforza l’effettu. È i materii, coghju, legnu, granitu, falsu marmaru dani à u locu un ambienti distintu, fora di u tempu. Ùn hè fattu nunda à casu. Hè stata listessa sin’à oghji cù i mudifichi fatti da accoglia di più cunsiglieri (63 inveci di 51) dopu à a fusioni di i trè cullittività u 1mu di Ghjinnaghju di u 2018 (i dui anziani dipartimenti è a Cullittività Tarrituriali di Corsica) : l’armunia hè stata rispittata.

Cuntatti

Aveti una dumanda ? Vi ci voli un’infurmazioni ? Eccu u cuntattu…

Scopri i giardini

Sapè tuttu nantu à i ghjardini, a so storia, a butanica….